{ أنــشـــــودة مــــجــــــــد الـــشـــــرطـــه } / بقلم الدكتور/خالد عبدالحميد خربوش

{ أنــشـــــودة مــــجــــــــد الـــشـــــرطـــه }
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بمناسبة إحتفال مصر بعيد الشرطة يوم
٢٥ يناير من كل عام.
 للدكتور/خالد عبدالحميد خربوش

[ كلمة إهداء ]

يااللي ملاك إلهامي
أهديكي نظم كلامي
الميم:تقول مشغول بك
الصاد:صلاحي فــ قربك
الراء:ربيعنا فــ حُبِّك
يامصر أنتِ غرامي

********************************

شهر يناير...آه فاكرين
بتاريخ كام!! خمسه وعشرين
سنة إتنين بعد الخمسين
قبل مجيئنا سنة ألفين
 هو دا عيد الشرطيين

واسمعوا منِّي القِصَّه بحالها
زي ماجِدِّي حكاها وقالها
مصر ماتنسى الخير لرجالها
 كلمة حق...وحقها دْين

ويَّا عُرابي رجالها إتَّحَدُوا
في يد الجيش إتصافحوا إتعاهدوا
ماينام جفن العين إن جحدوا
 حق بلدنا المغتصبين

واجهوا الظلم بقوَّه ضئيله
كان فــ صمودهم كل الحيله
وتاريخ مصر بجمله جميله
 قال دي طباع المصريين

من بريطانيا المستر«بوند»
مصر إبنها«زقزوق» م الجُند
هددُه رد الجندي بعند
 مابيعلاش ع الحق حزين

أربعتاشر سنة الحرب
العالميه الأولى في قُرب
وادي النيل إتجمَّع سِرب
 شرطه وجيش مع مدنيين

شرق الدلتا جنوبها وغرب
ويَّا شمالها وقالوا يارب
كون ويَّانا شعارهم ضرب
 قوة صف المُحتلين

فِرِح الشعب وقام حيَّاهم
واما اتأكِّد من نواياهم
فيها مشاعر صادقه حَبَاهُم
 تحت شعار( الله و الدين )

في تسعتاشر سنة الثوره
من مناصبهم كشفوا مؤامره
نفي عناصر غاليه ودُرَّه
 جوَّه عيون كل الملايين

قال المصري ماتستهون بي
يااللي فــ بلدك إسمك«لِنْبِي»
ح اصبر .بُكره ح تقول ذنبي
 إني ماكنت من السامعين

بمرور سنه بعد الخمسين
شهر نوفمبر يحكي يومين
في سبعتاشر وتمنتاشر
 دور الشرطه في معركتين

قام في مدينة الاسماعيليه
ضرب ودكّ محافظه قويه
رد رجال الشرطه بــ نيَّه
 عاشت مصر علم لُه جبين

نَفْس الموقف بعدُه بيوم
بورت سعيد بتصد هجوم
جوَّه مدينه دافعها تصوم
 عن تهديد ووعيد وأنين

كان لـــ سويسنا نصيب في مجال
صد وردّ العدا أندال
واستشهدوا من بعد نضال
 جنب لـ جنب الفدائيين

نمنا وسهروا بيحموا بلدنا
ماتوا يقولوا تعيش أولادنا
يقروا تاريخ ح يلاقوا جهادنا
 شرف المصري سنين وسنين

الاستعمار كان بينهم حاير
ويوم إتناشر..شهر يناير
(تل كبير) والعيد له بشاير
 عيد الشرطه يامستمعين

هاجموا التل بنار مدافعهم
حاولوا عبور الكوبري منعهم
جُندي (حسين حنفي) ووقعهم
 وسط المَيَّه بحلّ رصين

زحف الجُندي <الفهد ومعده>
نزل الترعه وحلّ القاعده
تحت الكوبري ماقالش مُساعده
 بس أصابُه رصاص غاشمين

قاومت ثلاثيةِ العدوان
كانت زمن النكسه آدان
صحُّوا الشعب بعزم وكان
 ويَّا ضميرهم وطنيين

عُمْر اليأس ما دَبّ قلوبهم
حُب وطنهم كان بيجيبهم
عند طريق يجمع مطالبهم
 الحُرّيه من الطامعين

واما اتحقق بعد كفاح
حلم بلدنا....قائدهُم صاح
إحنوا رؤوسكم رمز نجاح
 شرطة (مصر أم الغاليين)

كان تقدير مُتَحَضِّر عصري
يبقى واجبنا كــ مصري لــ مصري
نرفع راسنا ورمز لنصري
 قوموا وحَيُّوا شهيدنا الزين

قوموا وحَيُّوا رجال الشرطه
شرطة مصر يامصريين
شرطة مصر يامصريين
شرطة مصر يامصريين
٠••••••••••••••••••••••••••••••••••••
مُهداه إلى شرطة مصر الغالية في عيدها
 من الدكتور/خالد عبدالحميد خربوش

أنشودة مجد الشرطه