أخت الرجالة
عندنا الزين سلالة ورثناه من العمة والخالة
هذا زين الرجالة مايعرف كلمة لالا
هذا ولد الجود والأصالة
من ظهر راجل مايعرف ذلالة
عليه هدّة هدّة بطولة وبسالة
لما يجلس في مجلس يقعدة قعدة شهامة
يمشي مرفوع الرأس القد والقامة
هذا خويا عباس زين الرجالة
عنده نظرة الطير
وصوته صوت الأسد يزئر زئيير
وقفته وقفت الأمير
إمشي وصاحبه ماتخاف ماتحير
في كتمان السر غارق مثل البير
وإذا قصدته في الشدة يكون عندك في الحين
هذا خويا حمزة بعيني هو الأمير
عنده خانة فوق الحاجب زادت من بهاه
هو نور البدور صاطع في سماه
الله يرحم من جابه ورباه
تسلم هذي الضحكة في محياه
تفرح العين يوم تشوفه وتلقاه
ماتحلى السهرية إلا معاه
يارب تحفظه وترعاه
هذا خويا بلقاسم تفرح العين يوم تشوفه وتلقاه
هذاك الزين عياني بحبه بعيد وداني
بغرامه خلاني سلطانة زماني
هذا زوجي الغالي
