### أم الشهيد ### // بقلمي الشاعر / السيد محمود

### أم الشهيد ###

بتبكي ليه يا أم الشهيد
أمانة عليكي تفرحي

اوعي يا أما تحزني و
حياتي عندك زغرتي

النهاردة يوم فرح و
الجنة صارت مسكني

جيراني صار النبي هو
إنتي السعادة تكرهي ؟

الملايكة فرحانين و حور
العين متزوقين لزفتي

و ربي عايش و شايفك
بس دموعك جففي

قولي لحبايبي إني
عايش وسطهم بتمنى
ليهم فرحتي

باركيلي منحة ربنا
شرباتي يا أما وزعي

استبدلي حزنك فرح
و الزينة يا أما علقي

يا أم الشهيد كل أم
بتحسدك الحزن يلا
ودعي

شيفاني ميت مبتسم
و باينه في ملامحي
ضحكتي

المذلة إتبدلت عزة و
كرامة و هو دا كان
مطلبي

يا أم الشهيد إفرحي
راسك لفوق إرفعي

اوعي يا أما تندمي
هتعيشي بيا تفخري

إبنك شجاع حرر بلد
كشف الغطى صحى
النيام

زي شعاع الشمس
جاب معاه الفجر
شق الظلام

دمه سال نور طريق
عن العينين زال الغمام

ضحى عشان خاطر البلد
للكفاح كان الإمام

بدم الشهيد مصر صارت
مدرسة محراب لطلاب
للعلام

مش جديد مصر الحضارة
تكون كدا هي دايما في
الأمام

بقلمي
الشاعر / السيد محمود
السبت
6 / 10 / 2018

إهداء لأرواح شهداء اكتوبر 1973