لسه_فاضل_منى_كام // بقلمي// رضا سالم

#لسه_فاضل_منى_كام
كااام محطه سيبت فيها حته منى
سيبت عيل لسه فاكره
كان بيلعب
كل ماجرى عليه بيهرب
كان يشخبط ع الحيطان
كان ف نط الحبل جان
كان يزوغ م المدارس
يجرى يلعب ف الغيطان
كان يحب كتير يشاغب
هو وولاد الجيران
راح وسابلى الف ندهه
لسه صوتها ف الودان
راح وسلمنى لمحطه
فيها أصعب إمتحان
سيبت منى شاب مجدع
كفه يملا الشمس بيه
حلمه يملا الكون وحبه
شوفه بيسابق عينيه
كان شويه ومش هابالغ
يفرك الصخر بإديه
كان بيحلم يبقى فارس
بس دا مابقاشى ليه؟!
ف المحطه شفته نازل
قبل ما اسلم عليه
هان عليه ازاى يفارق
أو أضيع من بين إيديه
قضى طول العمر عايش
بس تايه مش لاقيه
كااام محطه باقيه لسه
لسه فاضل منى كااام
جوا عودى الف جته
بتفارقنى حته حته
باقى منى كااام جرام
الحياه أولها خطوه
والنهار يبدأ بشمس
السنين بتموت يوماتى
بعد بكره يبقى أمس
والكلام مش بس دوشه
الكلام فيه برضو همس
البنا مش بس طوب
والسنين مش بس رص

رضا سالم