أنا_وانتى // بقلمي// رضا سالم

#أنا_وانتى
يادوب قصه كانت لسه
بتكتب كلمه من حرفين
يادوب كنا ف أولى حساب
يادوب نجمع مانطرحشى
عيون تفرح ماتدمعشى
بنتعلم يادوب نمشى
بنتعشم نكون أحباب
وأول لحظه جمعتنا على أول طريق مشيناه
مانعرفشى انها بكره هاتتحول تكون ذكرى
مانعرفشى اننا حتما
هايمسكنا كمين واقف على بيتنا
يفتشنا يطلع من جيوبنا الشوق
ويأمرنا نقوم نرفع إيدينا لفوق
وياخد منا ضحكتنا
خدوا البوسه اللى كات حالفه...
ماتيجى ف يوم تسيب خدك
خدوا الفرحه اللى كات لسه...
بتتمشى على حجرك
سابولنا حكايه من سطرين ف قلب كتاب
أنا وانتى......ما نبناش م الفرح ساعتين
بقينا ف الغرام نصين
لا عاد ينفع نكون واحد...ولا ننفع نكون اتنين
سابولنا حكايه مبتوره...
ونازله م الرحم ناقصه
لايوم تنفع تكون قصه
ولا حصه بتتدرس لأولى غرام
بقينا يادوب كدا صوره بقلب وسهم
وعين تبكى وعين تمسح أثار الدم
أنا وانتى أكيد أوهام
حوالينا الحياه زحمه
وشوش كالحه مانعرفهاش
وشايفين الحياه جنه
لكن دايما مابنعيشهاش
هنا صوره كانت ليا أنا وانتى
أخدناها ف ليل الجو كان فرحان
وبيوزع علينا الفرح بالمجان
أكيد لساكى فاكراها
وسامعه صوتنا جواها
هنا الحضن اللى كان البكر
هنا البوسه اللى كانت ذكر
هناك نظره كانت منك..وكانت لسه مكسوفه
هنا كم ضحكه عشناها لكن دلوقتى محذوفه
أنا وانتى يادوب ذكرى
وحتى الذكرى مخطوفه

رضا سالم