قصيدة عامية (( استحالة))
*************
استحالة
إني أنسى يوم ما كنّا
قلب واحد
عقل واحد
حرف واحد
تبتسم ليه الشفايف
كنت عارف
إن قلبك مهما يحصل
مش هيرضى بالوشاية
كنت شايف
إن قلبك مهما يقسى
مش معايا
حتى لما القلب يقسى
مش حكاية
يا حبيبتي
حد غيري جوا قلبك ؟
حد غيري ؟!
استحالة
*************
مش هصدق
إن حبك ليّا قسوة
مش هصدق
إن يوم ما ازداد عذابك
مش لغلطة
مش لنسوة
اوعى تنسي
إن حبك ليا فطرة
إن حبك ليا عادة
زي حملك ليا فترة
زي طلقك في الولادة
اوعى تنسي
إن حبك ليا حالة
مش قوالة
استحالة
اني اصدق
إن قلبك قلب قاسي
استحالة
*************
احضنيني
واسمعي منّي الحكاية
لو هعيش العمر أحكي
مش كفاية
مهما عاش القلب يبكي
مش هبيعك
للنهاية
لو هموت مش هنسى حبك
شئ حقيقي
مش رواية
احضنيني
احضني قلبي وضمي
إنتِ ابويا
إنت عمي
إنت فاكرة اني هنسى
إنك أمي
استحالة
*************
ترفعي الأسعار علينا
تسحلينا ..... تقتلينا
تشردينا ..... تهجَّرينا
هل هنرضى بأم غيرك ؟
استحالة
مهما كانت فيكِ قسوة
إنتِ أمي
مهما أعد الناس حبايبي
إنتِِ قلبي
إنت كل العدِّ عندي
مش كمالة
لو يضايقك حدّ منّا
يبقى غارق في السفالة
إنتِ فاكرة
إني هنسى إنك أمي
استحالة
استحالة
*************
شعر: شرف أحمد عبدالناصر
ليست هناك تعليقات:
إرسال تعليق