وبتسألينى ازاى أكون // بقلمي// حمدان نبيل الديب

وبتسألينى ازاى أكون
أنا الحكاية وشكلها؟
وازاى قدرتى تسألى
وروحى فيكى مسلمه ومستسلمه
مربوطه بحروف عينيكى السهرانيين
ومتشعلقه فى شعره من الرمش اليمين
وحالفه يمين ما تفارق الروح ضلها
وفى حالة رمشه من عينيكى
هتنزل الروح إنما
بهمس يشبه للحرير
وتسلم على محياكى
قبل ما تبعت جواب مسوجر
لقلب دايب فيها ودايبه فيه
فيمضى قلبك ليها بعلم الوصول
ويفتح لها ببان الشوق
ويحلف يمين
مايدخل قلبى غيرك
من العاشقين والمغرمين
ماهو كل سطر اتملى
من حروف العشق كان لمين؟
وكل همسه من المشاعر
اتزينت واتعطرت
والعطر فاح عبيره
كان لمين؟
كل الحروف شهدت بإن
المعنى كان مفهوم
ولا أى واحد من العاشقين
يقدر يلوم
طلوع الروح بالعشق
ولو حتى بلغت الحلقوم
ولو حتى بلغت الحلقوم

تحياتى
حمدان نبيل الديب