وقدمت الحياه مهرك
وقدمت الحياه مهرك
وحنيت للقمر كفى
وقدمت الربيع أخضر
وبرضوا شويه مايكفى
وبكتبلك كلام طازه
كلام متنقى ومصفى
وبابحث فى اللغه عن وصف
أعبر بيه ويرضيكى
وفتشت الكلام بالحرف
مفيش جمله تكفيكى
لقيتك لسه فوق الوصف
يصونك ربى يحميكى
ياعايشه بين حروف إسمى
ياساكنه جوا أنفاسى
بحبك مهما زاد همى
وشايلك برضو على راسى
دا مرك لو يكون حنضل
بيحلى بين حروف كاسى
مشيت ع الشوك عشان خاطرك
نسيت انى مشيت حافى
وكل ما ودى يتكعبل
يقوم تانى ويتعافى
كتير فيكى اللى يشبهنى
ملامحك هى أوصافى
واشتاقلك كتير لما
أحس ان الحنين دافى
ولو بحرك ملوش مينا
راح اعمل م الهوى سفينه
وبحر الشوق دا مجدافى
ف ليه الضحكه مشروخه
وليه البسمه بالعافيه
مسيرنا ف يوم هنتلاقى
وترجع ضحكتك صافيه
تميل الشمس قدامك
ويبقى الكل خدامك
واشوفك ملكه على عرشك
ويكتر ليكى خطابك
لكنى لسه متحنى
صلاتى جوا محرابك
ولسه هميل على خدك
تقوم الحرب على بابك
يفوز بيكى اللى يستهلك
أمانه ماتنسى إنى ف يوم
دفعتلك الحياه مهرك
ليست هناك تعليقات:
إرسال تعليق