**تحب تكون**/ بقلمي/ رضا سالم

**تحب تكون**

تعالى ياللى شايفنى هنا وسرور
تعالى جرب الأوجاع وخد لك دور
وخلى عنيك تشوف خاطرى.....
اللى عاش مكسور
دموع العين على خدودى تعبى بحور
وحسدنى ياناس على إيه
عشان باظهر لكم أضحك
تعالى جرب الحوجه ومد الإيد
مرار العوزه بيخلى الآلام بتزيد
ونادى معايا ع الفرحه اللى واقفه بعيد
تعالى عيش حياه مره
وواخده م العذاب مواعيد
تعالى وعيش فى وجدانى
وإلبس وش غير وشك
تحب تكون واحد تانى
تحب تكون كدا زيي
انا كائن مليش تعريف....
وواخد شكل إنسانى
دنا من كتر أوجاعى
بادارى وباشتكى لله
لاعمرى أخدت من حظى
ولا حسيت فى يوم معناه
تحب تخاصمك الضحكه متضحكهاش
تحب تشوف حياه حلوه ولا تعيشهاش
تحب تقسط الفرحه.......
ولا تجربها يوم بالكاش
تحب تجرب الأحزان
تحب كمان تعيش متهان
تحب تغمس اللقمه بلقمه حاف
تحب تعيش جبان خواف
تحب تعيش حياه عوجه
لا عدل تشوف ولا إنصاف
يعدى الليل وليل تانى
ولسه الصبح ماعداش
مادام حالك مهوش عجبك
تعالى وجرب الاصناف
عيون الناس بتدبحنى
هموم الكون بتملانى
و للأفراح بقيت مشتاق
وبادعى همى ينسانى
ياريت الحزن مايطول
 ياريت الفرح يلقانى

#رضاسالم