لما بتغيبى./بقلمي/ رضا سالم

لما بتغيبى.....
الشمس بتغيب م النهار
وبحس بالروح تنسحب
والقلب مش واخد قرار
والعيون م الحزن تدمع
ألقاها فى حالة انهيار
و الوجع يوصل مداه
والآاااهه بتكون ألف آااه
وانتى حاسه أكيد لهيبى
صهده واصل منتهاه
مدى الأيادى وسلمى
نسرح فى سكة عشقنا
نرسم ملامح حلمنا
رغم اننا مستبعدين
مستنى لحظه تضمنا
سكتك مدخلها فين؟؟
الشمال ولا اليمين؟؟
ملامح لهفتك ليا
ترد الروح لروح غابت
بقالها سنين
فكتبتلك مليون كتاب
ونسختهم على كل باب
حتى الشوارع والحيطان
والحروف جوا الميدان
بتنادى يسقط من زمان
كتب القلم رغم الألم
داب الكلام جوا السكوت
فندهت ليكى بأعلى صوت
مسمعتنيش
وللا يمكن سامعه بس مردتيش
كان نفسى اقولك كلمتين
بيهم نكمل حلمنا
وللا انتى إيه؟؟......مبتحلميش
لملمى كل الورق
متبعتريش...
صورى كل المشاهد
اللى خاين واللى جاحد
واللى قاعد جنب كنبه
واللى صان حبك وجاهد
واللى عامل نفسه زاهد
واللى عاش دور المشاهد
واحكى للعشاق حكايتى
وان غرامك كان نهايتى
كملى مع حد تانى
هتلاقيلك مييييت ياسين
هتلاقيلك ألف عنتر
بس اوعى تفرقيهم
لملميهم ..أحضنيهم
واحضنى الاشواق هتكبر
افردى للموج شراعك
إثبتى.......ولاتغرقيش
دالحنين جوايا عايش
والآمال لساها باقيه
 والغرام ......مبينتهيش

#رضاسالم