........ أمى ........
....... أشعار ........
..عمادالدين العيطة..
كل سنة وإنتِ ياأمى
فرحانة والله وتتهنى
تتهنى بينا .. وبعيدك
ويزيدك ربى وتتهنى
ويحقق كل ماتتمنى
وتحضنى الفرح بإيدك
ياكل حاجة ف الدنيا
يادنيتى وكل ماليا
إنت صحيح نص الدنيا
ومكملة النص التانى
وتحت رجليكى الجنة
إنتِ اللى بتخافى عليا
ولما بغرق ف همومى
ألاقيكى مش عاوزة تقومى
سهرانة جنبى بتدعيلى
ومن حنانك تسقينى
يابلسم بيداوى جروحى
أفديكى بعيونى وروحى
فاكرك ياأمى وأنا صغير
والدنيا عمالة تمطر
وإنتِ لفانى بشالك
كل اللى هامك تحمينى
واللى كان شاغل بالك
إزاى بسرعة تخبينى
ومين فى الدنيا كان قدى
لما بوستينى فى خدى
تعيشى ياأغلى ماعندى
ياأمى .. ياكل الدنيا
ليست هناك تعليقات:
إرسال تعليق